غسان مطر (من وجه اخر)..
احنا كلنا نعرف غسان مطر ابو صوت تخين اللي دايما بيعمل أدوار الشر واللي شعره متسرح لفوق .. لكن تقريبا ناس كتير متعرفش حاجة عن حياته .. فخليني اقولك نبذات عن الراجل الجميل ده..
هو اسمه الحقيقي عرفات داوود حسن المطري.. فلسطيني من يافا.. سنة 48 اتهجر مع ابوه واخواته اال 14 من فلسطين.. وفضل رحالة لحد ما جابه المخرج حسام الدين مصطفى يعمل دور شقيق الرسول بالرضاعة "عبد الله بن العز" في فيلم الشيماء.. مش عارف ليه ساعتها المخرج نيازي مصطفى شافه في دور شرير في فيلم "المتعة والعذاب" واستمرت الحكاية.
في سنة 1969 قدم فيلم اسمه الثائر من بطولته وتأليفه عن القضية الفلسطينية.. وحتى ان أبو مازن.. اداله لقب "فنان الشعب الفلسطيني" وقال انا فنان الشعب الفلسطيني دي اهم من اي جايزة تبقي فنان شعب عظيم زي ده..
هو اتجوز وخلف 4 عيال، ابنه الكبير سماه جيفارا.
جيفارا ابنه كان رايح يدرس في الجامعة في فرنسا.. فقال لابوه ينفع اروح ازور امي واخواتي في لبنان قبل ما اسافر فرنسا . قاله روح وانا هخلصلك ورقك هنا في القاهرة.. وبالفعل خلصله الورق .. وكلمه قاله بكرا تبقي في مصر عشان تسافر يا جيفارا..
ساعتها غسان كان بيصور في مسلسل "محمد رسول الله".. فتح إذاعة مونت كارلو يسمع الاخبار .. ايه اول خبر في النشرة.. قوات الاحتلال الاسرائيلي تبيد اسرة الفنان غسان مطر بالكامل .. تخيل تبقي بتسمع النشرة تلاقي ان خبر ابادة اسرتك أول خبر.. الخبر زلزله.. بس كان فاكر انه خبر مزيف فاتصل بمراته مفيش اي رد..
بعدها بخمس دقايق.. كلمه حماه قاله اكدله الخبر ببكاء شديد " مراتك وال 4 عيال ماتوا الله يعوض عليك يا غسان."
كان بيحكي بثبات شديد مع مني الشاذلي عن الحكاية وفي النص كده سالته قالتله مش ندمان.. قالها ولو رجع بيا الزمن مش بس عيالي الاربعة لا كل اهلي فدا فلسطين .. انا مؤمن بقضية بلدي لحد ما اموت انا وعيالي وفلوسي وبيتي وكل حياتي فدا فلسطين..
طيب ليه بتقبل تعمل أدوار صغيرة وضعيفة شوية واختراع يا كوتش واعلان حلاوة طحينية واعمل الصح وكده .. قالها بعمل كدا عشان اكل عيش.. كل فين وفين لما يتعرض عليا دور كويس لو مثلت الكويس بس هموت من الجوع وبعمل الأنواع دي عشان اعرف اصرف علي الكويس.
ومات غسان مطر في هدوء شديد في 27 فبراير 2015، بسرطان المعدة، وكان عمره 77.
الله يرحمك ياعم غسان
اكرم داوود اللهيبي, تمارة الاردنية, mohamad wattad, احساس انسانه, مريم العراقية و ملاك صعبة الامتلاك m يعجبهم هذا الموضوع